(Lumban Bulbul Balige)
Molo mulak hamu saolat nai,
sahatma nian sita-sitam,
gabe ho, gabe jala sonang.
Molo mulak hamu saolat nai,
lehon roham tu baringin partangiangan.
Tamburon uratna unang hona gara ni ari.
Paiason bonana, asa bagak idaon dung bonom mataniari.
Pauneon alamanna, asa siat nahundul di laon ni ari,
marsada martangiang, pasangap Mulajadi.
Molo sahat hamu saolat nai,
molo boi nian, unang topek di topi ni ari.
17 Maret 2011
Video Puisi ada di: https://www.youtube.com/c/SimangunsongParkaroncong
PUISI BATAK | JOU AHU MOLO LILU
Tarulang ladang Amang, jou ahu.
Mahiang saba Inang, marigat gadu-gadu, jou ahu.
Manunda si parbue Amang-Inang,
gorahon ahu sian balatuk ni jabu,
pittor ro do ahu, ro tarhipu-hipu.
Nunga salpu dakdanak tahe,
tano ranto nama nidege mangaranto tahe.
Dang ladang be jinama loja ni pamatang do nihilala.
Dang gadu-gadu be jinama marsak ni roha nama nihilala.
Dang horbo be jinaga lomo ni roha nama pinatupa.
Nunga salpu dakdanak salpu tahe,
tano ranto nama nidege mangaranto tahe.
Dang adong be namanggora gabe lilu hape.
Dang adong be namanjou gabe lilu hape.
Antong Amang dohot Inang naburju,
jou ahu molo lilu, topet sian balatuk ni jabu.
5 April 2011
PUISI BATAK | ARI JUMAT ARI ONAN
Mardalan hami sian Sirisi-risi,
mangeal do ahu nian,
hape inangtua manghunti hirang namarisi,
sayur paet, bawang pere dohot kopi.
Di abarana tali ni hajut ampe,
indahan dohot tes isina tahe,
tugo nami arian unang mauas jala male.
Ujui dang adong dope becca,
di Dolok Sanggul pe otik dope motor.
Dua batu hami mardalan hojor,
asa tumibu sahat tu onan,
asa gadison sude nadiboan,
unang gabe labe-labe etongon.
Menek dope tingki i,
dang singkola dope nahuingot.
Nadiparmudu inangtua do ahu saolat,
ala natua-tua laho tu Jakarta borhat.
Dung sahat hami tu onan,
hutaruhon kopi tu tokke namokmok i,
dungi hupahembang hami dua goni namaribak-ribak,
dipajojor inangtua boanonnai,
dang sadia leleng suda sude gojap.
Serom ma ibana,
serom ma ahu tong mangalompit goni namaribak-ribak.
Mardalan pat do hami tong mulak,
Sira, dengke asin, kaccang nama isi ni hirang,
martabak muse dohot saliter rondang-rondang.
Ahu pe somangeal be,
ditanganhu karupuk jange nakambang,
dohot sabungkus roti bulan.
7 Maret 2011
PUISI BATAK | HUTA HUTA DO HUTANAMI
Huta-huta do hutanami
Huta nasolot di tano Humbang
Hasundutan mataniari
Huta-huta do hutanami
Dilinggomi dolok pinapan
Jala mas nagorsing maringanan
Godang muse hau namarulubalang
Huta-huta do hutanami
Huta namanubuhon anak-boru parsingkola
Godang muse angka namarpangkat
Huta-huta do hutanami
Huta napagodanghon napistar namalo
Malonai tung so taralo
Huta-huta do hutanami
Huta namangolu sian denggan ni tano
Tubu salak tubu bagot
Tubu kalapa godang habang sitindaulok
Tubu tobu godang habang salimpoppot
Tubu atturmangan habang ambaroba habang marimpotimpot
Tubu kueni tubu same napompot
Rias pe rade, siala buni-buni monggop di tano nahornop
Tubu muse nilam tubu horbo maradu marponjot
Huta-huta do hutanami
Godang sampuran maradu timbo
Mian di si ihan aekna nalambok
Tabo di si marlange molo ari mansai mohop
Huta-huta do hutanami
Alai tu luat naasing dang talu gogo nami
Dang talu malo
Dang talu mora
Dang talu mokmok
30 Nopember 2010
PUISI BATAK | MANGALALANG AMBASANG
Jumpa di tingkina uju so borhat singkola
Sangahonon do tu bona ni ambasang
Luluan borasna namadabu marsampatan
Allangon annon dung sae parsiajaran
Olo do dapot tolu rodi lima
Molo tolu do ba pasmai antong
Sabiji di reses parjolo
Sabiji nai di reses paidua
Sabiji nai muse dung mulak annon
Niula do loja mamboan on
Umborat sian bukku parsiajaran
Ala molo adong ambasang on
Tung godang do mangido mardongan
Alai molo so dapotan sadarion
Ingkon ibama loja mangalului dongan
Dang piso binaen mangalangkati
Niharutus do sahat tu sibuknai
Sae sakkarut pinasahat du dongan
Diharut ibana muse dipasahat tu naasing dongan
Lima baba mangharut sada ambasang
Sampe so adong be tonggina
Sabut nai pe sampe marlangan
Antong asa unang dapot namarlangan
Iba ma nian dapotan mangalalang
28 Agustus 2010
PUISI BATAK | MANGAN MANOGOT TINGKI SINGKOLA
Indahan nabodari namarhorak i
Tuanghonon aek las tu si
Janggut-janggut nangali
Pinasisi uju marbagi dohot anggi
Tabo do nian parniahapan najolo
Alai nuaeng on tung so hataon do
Lumobi molo habis ikkan
Sira nama binahen dongan
Nigaorhon tu indahan
Ima gogo borhat marsiajar
Mangalele malo ni angka dongan
Mongan manogot tingki singkola
Unang be tarulak nian
23 September 2010
UTTEJAU NAMALAMUN
Onma namasa di hutanami
Maol do dapotmu uttejau namokkol
Lamma namalamun
Haru narata pe suda
Ai metmet dope nunga didugur
Mutiknaipe dohot sabur marurus
Onma tahe uju dakdanak
Soadong allangon tikki marmeam
Uttejau nang mutikna niparhajop nama
Tung ipe nunga sonang roha
14 Agustus 2010
BURA-BURA TU SUPIR LOJING
Bursikma ho anaha
Molo adong borua bursik ma ho
Londosonmu tano napagodanghon
Urbuknai manompas pardompahan
Bustaknai sampat sahat tu balanga
Bursik tu ho anaha dohot ho borua
Segaonmu dalan
Segaonmu alaman
Segaonmu parbalokan
Segaonmu muse pansur paridian
Sursaronmu nang parpamilian
Londosma ahu anaha
Tombomma napagodanghon ho borua
Lupa ho huompa di tanggurungki
Lupa ho di panarusanki
Tabodo engkelmi tingki gelleng
Ia dung magodang
Mara boanonmu tu bona ni pinasa
Bursikma ho anaha
Bursik tong ho borua
Molo mate ahu
Matema ho tong di roha
9 Agustus 2010
HUTA NALONGO
Jou-jou...
Jou-jou marhuratak martangi-tangi ho nalilu
Jou-jou...
Jou-jou pasahat arsak marsabur ilu
Dison uratna parbuena tung timbo
Dabu malala soadong maningkirho
Jou-jou...
Jou-jou jabu nang huta nabajar namarbaju
Jou-jou...
Jou-jou bollang simalolong marilu
Berengon alaman somarhandang pajok tu tano
Napuran marrata marsiranggut tu tarup dabo
Ima jou-jou tuho
Jou-jou ni huta nalongo
Naung hapit di roha ni angka bangso
Satongkin nai laos mago
Jou-jou...
Ima jou-jou tuho
Jou-jou ni huta nalongo
10 Juni 2010
TANGISHU DOLOK SANGGUL
Nunga sabur mudar dongan
Malala ate-ate mambege i dongan
Timus pe manosak andora dongan
Natudia laho bisuk ni roha dongan
Segama namartutur
Namarhombar balok martanggir salot
Bada tu bada manghutur
Nga tudia namarbisuk solot
Seganai partondongan ale dongan
Alani muruk nasohataon
Seganai parpamilion ale dongan
Alani bupati tu lima taon
Inang mangalo boruna
Amang mangalo ianakkonna
Amangboru mangalo paramannya
Tulang mangalo berena
Ompung mangalo pahompuna
Baoa mangalo ibotona
Simatua mangalo helana
Dongan mangalo donganna
Alani silima taon siboan mara
Tangishu mai Dolok Sanggul
Tangis siboan mudar narara
26 Mei 2010
HUPAIMA HO PAHOMPUKKU
Nunga botari nuaeng boru
Mataniari dangbe mohop situtu
Anggo pamatanghu tong dope boru
Margara-gara situtu
Hosakku pe nunga sangkot-sangkot
Modom tung soboi tigor
Berengma boru
Hundul nama ahu asa boi marhosa
Asa boi modom dang marngilu-ngilu
Hancit hian boru
Nunga sai naeng mangido nian tu Tuhan
Asa dialap ahu bornginon
Asa ditongoshon suru-suruan
Manogu simangidokku tu lambung-Nai
Alai molo hubereng ho boru
Hubereng siubeonmi
Muba do roha
Hutaonma hancitni kanker on
Stadium opat on
Di siubeonmi borukku
Martabuni pahompukku naparpudi
Berengonhu nian satongkin
Paima lao ahu salelengna
Tu nampuna tondi nampuna jolma
Di siubeonmi borukku
Paimaonhu pahompukki
Asa las rohakki lao
Adong panggantikki
Hupaima ho ale pahompukku nauli
Amangoi hancitnai Tuhan...
10 Mei 2010
Note:
RIP
Amarhumah Inangtua Surabaya
ANDUNG NI ANAK SIAMPUDAN
(Tingkir Bona ni Haminjontai)
Abang...
Tung mulak ma jolo ho
Bereng hutanta on
Porsuk parir so tarboto-boto
Dahan huli marlokko-lokko
So hadalan be tahe dago
Abang...
Tung dapothon ahu anggimon
Pasahatonku tuho lungun ni roha on
Tombak haminjon tading-tading inon
Nunga sae dipadosdos beko
Da tading ma holan holso
Molo mamereng tu nadao
Ale Abang...
Tu ise nama mangalu-alu
Namarhuaso songon tukko-tukko
Pajok songoni sambing di tano
So adong lapatanna margogo
Sip do ibana mamereng beko
Mangarjang aek godang
Mamolus tu tombak rea
Manolbak dolok
Pasaehon tombak
Sambor ma napajok
Abang...
Molo tung mago pe ahu marsogot
Jambarhu namai
Hutamonpe gabe mohop
Bagianmu nama i
Naung sahat andung-andunghu
Tu sipareonmi
Abang... tung mulak ma jolo
Tingkir bona ni haminjontai
24 Maret 2010
SIGANDING DOHOT SIGAYOK
Tikki menek adong nahuingot
Dua pinahan lobu nami nalomuk
Sada birong sada nai marganding
Digoari siganding ala sisikna songoni
Ia nabirong digoari sigayok
Ala molo gedek-gedeknai dihao
Pittor modom ranggang ibana di tano
Molo tu balian hami saripe sian sogot tu botari
Binoan nasida dohot mangalaosi ari
Hukobet rungkungnai dohot tali palastik
Songon mamboan horbo saganjang dalan
Ihuthononna si parmahan
Nahuingot muse
Mate matua do nasida nadua
Dang digadis manang dibinda
Ala asi roha marnida
Ima tahe
Boi songoni holong ni roha
Marnida babi nadua
Naso hea manunda
Nangpe so adong handangna
12 Maret 2010
MANUTUNG GADONG DI BALIAN
Hos ni ari dang tarhilala di pamatang
Alogo namangullus lambok di tonga tombak
Bona ni hapea nalinggom tabo hundul marnonang
Lupa di tikki parsadarian
Lupa dang dope mangan arian
Topot mata manatap tu bariba
Di topi ni paremean balian
Bona ni gadong nabalga
Topek ma ra molo tinutung
Di toru ni parira namarpudun
Galakon ma jolo api sian anggala
Tindihonon ranggas-ranggas namahiang
Tambaon muse soban namartaha
Asa marrara garana
Jala godang sirabunna
Umpaton sabatang bona ni gadong
Paias tanona dohot jukkit-jukkit
Surukhonon di toru ni sirabun
Paimaon satongkin udutan mamben kopi natonggi
Tus...
Mallutus gadong di toru ni sirabun
Nunga masak gadong natinutung
Rukkaran dohot jukkit-jukkit
Pangali satongkin di bulung ni sukkit
Paias lakkatna nabirong maragong
Unang paiashu
Ala tabo do sisik nai karing-karing altupon
Dungi bola dohot tangan
Martimus-timus jala las
Holpu gadong di pamangan
Lan ma i saruputhonon kopi di makkuk
Sodap ma parniahapan
Gabe lupa mulak sian balian
HEA DO HUTAON NAPORSUK
Dao di bariba ni hapea an
Tarbege dope hallo-hallo sian onan
Ima suara ni parginseng si Pakpahan
Dao hian do nian disan
Ai au dohot dainang hot di balian
Paimaon nami gok gota di dasar ni kalapa
Asa bakkuhonon satongkin
Dungi boanon tu pasar
Asa boi maronan
Ima porsukna hamuna
Ingkon mangguris
Dainang di sogot onan
Asa botari adong sangkuhonon
Manuhor gambas nanaeng diambolongkon
Asa mura
Ima porsukna hamuna
Nunga didoiti rongit pathi
Leleng paima gok dasar i
Diputik dainang honas naposo
Di tano ma dilakkati
Ro ijurhu mangida i
Nikkuma mandok
Diama jolo saotik inang
Male hian ahu
Toho tahe pamatang gale
Sian sogot so mangan dope
Ima porsukna hamuna
Diorai inang huallang honas naposo
Unang haccit butuha gabe marholso
Hutaon ma satongkin nai jolo
Sai tu onan hubaen roha margogo
Ima porsukna dago
Peoponku do turian ari Senen on
Bagahononku haduan
Tu pinompar nang dongan
Hapogosan di haposoan
Honas naposo pe so hapangan
Ima porsukna parngoluan
2 Maret 2010
DISON MARADIAN
Dison maradian
On ma topotonhu di bulan onom
Di udeanmu Ompung boru
Digurathon umur siapulutolu
25 Pebruari 2010
Songgot roha di botari nalilu
Hatop dang marhalilu
Dao pahompum martano sileban
Dang taronjak simanjojak mangardap
Habong pe so boi habang mangareap
Tangiangma hupasahat
Marhite alogo mangalaosi golap
Taruhon ni suru-suruan sahat tu binanga nabolak
Dison maradi hita Petua
Ninna Ompung uju ahu dakdanak
Di toru ni markisa Bulanda
Asa linggom tahilala
Ue di si ma Ompung tong modom
Modom saleleng ni lelengna
Asa tu si ahu ro musena
Jahaonhu di silangmi
DISON MARADIAN
OMPU PARUBAHAN SIHITE
MONDING MARUMUR 93
Dison maradian...
Dison maradian...
Dison maradian...
Dison...
1 Maret 2010
In Memoriam: Ompu Parubahan Sihite
Note: “Petua”: Panggilan Ompung padaku. Sebenarnya Patua.
TADINGMA SALUHUT NADENGGAN
Hinauli ni ri nabolak
Manginsolat di tonga ni tombak
Ambaroba habang hona songgak
Marbubur mabiar
Hape gabe masuk tu jobang
Tadingma saluhutnai
Tombak nang pangisina
Haduan hita pajumpa
Di ujung ni pardalanan
Dung mulak tu bona ni pinasa
Tadingma saluhutna
Saluhutna nadenggan
7 Desember 2009
PARMULAK NI PARONAN
Nunga pukkul lima nuaeng
Mataniari nunga holom tanom
Paronan naeng sahat nama tu jabu
Dapothononna ianak napaimahon
Rondang-rondang pe paimahon
Dakdanak i paimahon di pittu
Tes paet nunga diparade di ceret
Dung tuat hajut tu tano
Rade ma sigop aek paet tu rungkung
Mago ma sude loja naponjot
Nunga pukkul lima nuaeng
Tes paet nunga rade
Dakdanak nunga mamaitte
Rondang-rondang saolatnai sahat tahe
18 Desember 2009
DI SIPULAK TADING BOGASHI
Sampuran marbubur madabu tu batu
Timus nai habang tu langit napitu
Tumopothon partading ni tondi
Mulak tu huta najogi
Sian nantoari sahat tu ari naso maradi
Di batu marrerak hot jojakhi
Tading di si nang roha nauli
Di timus marhalimus rodi borngin
Muap di si sonang ni portibi
Rodi sogot naparpudi
Di Sipulak tading bogashi
Di batu di tano
Nang hotang pakkat nahurittak sian lombang
Di Sipulak tading bogashi
Nang haholonganhi
3 Desember 2009
HALIMITONGAN PARPADANAN
Udan simbur di tonga ari
Alai tong tarida mataniari
Nanget-nanget alai tangkas buti
Talpak ibana di sihadaoan
Bagak idaon ni pamerengan
Ingot di rohakku do tingki i
Dihusiphon ho nanget tu sipareon
Unang tompas udan simbur haholongan
Sotung hancit simanjujungmi
Nimmu tu ahu di toru ni sopo balian
Ingot di rohakku do tingki i
Marpadan hita naso jadi sirang
Saleleng adong halimitongan
Di tonga ni simbur udan
Dung sampuludua taon marsidaoan
Ho di huta ahu di parjalangan
Ho nunga muli ahu mampar dihasiholan
Sai naeng mulak ahu tu halimitongan
Halimitongan parpadanan
Asa unang tadalani parsirangan
30 Nopember 2009
Langganan:
Postingan (Atom)