HUTA JABU DOHOT TAMBAK

Mamolus ho sian huta nami 
Maradi satongkin di simpang opat 
Di pudim tugu Sumerham 
Tu joloan huta Tukka 
Tu siamun Parlilitan 

Jabunami dompak Parlilitan 
Jonok HKBP 
Jonok gareja i bona ni tarutung 
Balga situtu 
Rimbur bulungna 

Jabu matua nami sian hau 
Ujui martorumbara 
Sada tingki ditambai simin 
Satonga beton 

Tambak di lambung jabu 
Udean ni Ompung sian Amang
Jonok tu dapur 
Molo mulak ahu 
Martangiang di si 
Molo borhat pe 
Papimpit mata di si 

28 Nopember 2006 
*12 Malam. Menjelang Ulang Tahun.

SORDAK

Sordak ni pintu solat di para-para 
Ra dirimpu soban madabu 
Naeng ditutung lompahon lambuk 

Hancit simanjujung ni ama 
Tajom ingotna 
Gantung dope uju buha-buha ijuk
Sala ni si Ucok do antong 
Papindahon partahaan nakoring 
Dirimpu soban sordak i 
Diampehon tu para-para 
Tangkas ma antong hancit ulu mangaluli 

15 Nopember 2006

MARSAK ROHA

Marsak roha mangida namasa 
Dongan sasingkola nunga hasea 
Denggan karejona 
Sumalin ma ahu 
Tong marsada-sada 
Marhancit di Jakarta 
Soada sihumisik 
Mangan manaon ila 
Di jabu nabungka pintuna 
Mangido asi ni roha 

O Debata ni naporsea 
Dia do las ni roha tu ahu 
Didia ditabunihon ho 
Nunga palojahu ahu mardalan 
Nunga pauashu sialap ingkau 
Naeng mandurgok aek sitio-tio 

Tungpe ditabunihon partanduk pitu 
Paboa ma tu ahu Tuhan 
Unang pasombu ahu mate karing 
Dang marimbar tu jolma naasing 
Naso porsea tu huasom 
Ai molo sarupa ahu tu nasida 
Aha imbarhu hape naporsea tu Ho 

Nunga marsak Ahu Tuhan 
Marsak roha 
Simalolong marrara 
Tangis marbuni-buni 
Sipata ro husip laho maningkot 
Ro ma Tuhan 
Tung marsak rohakku 

19 Oktober 2006

SALAK PAKKAT

Sada hasolomanhu 
Salak Pakkat natonggi 
Sisikna marduri-duri 
Batangna pe songoni 

Adong sisada 
Piga sidua-dua 
Godang sitolo-tolu 
Siopat silima sionom pe adong 

Tingki poso pe i 
Batuna boi panganon 
Bontar rupana 
Damor-damor di ipon 

Kobun salak nami 
Di holang ni hapea 
Rata bulungna 
Balga borasna 
Tajom durina 

 Gabe naeng mulak ahu tu Pakkat 
Laho mangan salak 
Raphon dongan tingki dakdanak 
Horas Pakkat 
Hidup salak 16 Oktober 2006

NAPA - SITAHUIS

Molo ro ho tu huta nami 
Pakkat nauli i 
Jumpangmu sada binanga 
Di dolok digoari Napa 
Dungkan toru Sitahuis 

Sasintongna marsada do aekna 
Alai asa mura manggoari ruasna 
Gabe dibahen ma songoni 
Sitahuis dohot Napa 

Ari Minggu ribur do on 
Dung mulak sian gareja 
Laho halak manghail mamoluk nang manjala 
Gomodangan tahe marlangei 
Manimbuk sian bona ni hau 
Mamirsaki aekna 
Marbubum soarana 

Alai balga do biarhu 
Di hametmetan holan manonton do ahu 
Hundul sambing di topi ni aek 
Ala mabiar tu nabagas 
Mamoluk mabiar tu ulok 
Manjala dang huboto 
Manghail mabiar tu gea 

 Nang pe songoni 
Lomo do rohangku tu si 
Napa Sitahuis i

SAMPURAN SIPULAK

Ari Minggu ari holang 
Ahu raphon dongan 
Marmean tu sampuran 
Mandiori ragam ni hotang 
Dang di sampuran i hotang i 
Alai di tombak sahumaliang Sipulak i 

Dung sae naniluluan 
Hudapoti hami baba ni sampuran 
Dao hami mijur 
Sian ginjang batu sabalga tangan 
Sahat di toru sabalga horbo 

Aek godang Temba di son tong madabu 
Dung mardomu tu Sirahar 
Gabe so jangko balgana 
Marbubur soarana 
Marhapas-hapas aekna 
Sipulak marbubur 
So jangko balgana 

03 Oktober 2006

NUNGA RO HO INANG

Nunga ro ho Inang 
Raphon alu-alu na so dihatahon 
Alai simalolong manggurathon 
Marsak roham 
Paida buhabaju marsitaonan 

Dang pangidoan i 
Sapata do mandok 
Lapung ingkon oloan 

Pagodang ma roham 
Ala adong sada dalan 
Manginsolat di sada inganan 
Buni nuaeng on 
Alai haduan manolhas sipareon 

Nunga ro ho Inang 
Unang pola marsak roham. 19 September 2006

BORU SILEBAN

Sian habinsaran ompuna ro 
Taripar aek margalumbang natimbo 
Tubu ibana di son 
Di tano na rap taingani on 
Pusorna tanom di son 

Alai husungkun Dainang 
Boha do roham 
Aut ibana ma parumaenmu 
Aha pandokmu 
Dijalo ho do songon boru ni raja 
Tama do roham mamereng ibana di halangulu 
Raphon tubum marbagas marumatangga 

Hatahon ma Inang
Molo adong na solot di roham 
Hujalo doi 
Ra, adong podam naung hulupahon 
Ala martaon ahu di ranto 
Gabe lupa hatam 

Hatahon ma Inang 
Anggiat boi huoloi tonam 
Molo pe so boi 
Asa huanju roham 
Jala marpanganju roham 
Tu nanaeng parumaenmon 
Boru sileban on 
Na sipit mata on 
Hatahon Inang 

09 September 2006

TOLU DO HAMI SAAMA SAINA

Amanghu Simangunsong 
Di Sisuga-suga do sorang 
Inanghu Batubara 
Di Sirisi-risi tubuna 

Tolu do hami saama saina 
Ahu, ibotoku nang anggi siampudan 
Di Pakkat ahu nang siampudan ditubuhon 
Sundut pasampululimahon 
Sada do ibotonghu di Medan ditubuhon 

06 September 2006

PANSUR HAUAGONG

Jonok tu hauma Sinamo 
Ualu pansur manaburhon aek natio 
Ditorushon tu saba namargambo 
Lobina tu sampuran 

Sabalga ni ember mata mualna 
Sahaliang marsiranggut bulung ni oma 
Namarbaju mangusa pardompahan 
Nametmet salang-salang 
Ahu manaili sian dalan 
Ulinai pamerengan 4 September 2006

PULUTMA ROHAM

Pulut ma roham tu ahu anaha 
Dililithon ho tali balati di rungkunghu 
Sampe hurbe-hurbe sialapingkaunghu 

Aha do maksudmu 
Dihatahon ho ahu songon on songon an 
Songon onan 
Sidok hatana be 
Hape so marsitandaan 
Hata ni halak do dipahata-hatahon 
Sangapma molo sintong 
Alai molo dang sintong 
Mogap ma nasoumboto horhon 

4 September 2006

SIPANGARSAK

Molo husungkun bulung ni bulu 
Andigan pe ahu marbagas marjabu 
Dang adong mangalusi mardongan ilu-ilu 
Holan alogo do mangullus mamuntalhon alu-alu 

Ueee... pinompar ni Sonak Malela 
Boasa sai ro pangunjunan di tonga ni rura 
Ueee... anak ni raja 
Boasa sai ro arsak di ngolu na susa

03 September 2006

SADARION AHU MASIHOL

Dang huingot nunga ari papigahon dung hutinggalhon huta hatubuan
Ra nunga marribu ari marganti dung hudege tano sileban

Di pansur na jonok tu kobun hape i, masihol ahu maridi di si
Di tonga ni porlak na tubu bona ni salak i, masihol ahu manuruk-nuruk di si

Aut sadarion boi habang songon darapati
Pintor songgop do ahu di dangka ni gambiri na di pudi ni jabu nami-i

31 Agustus 2006