HUINGOT

Huingot tongtong
Tongtong di bagasan roha
Roha nang pamatang
Pamatang do dao
Dao di parserahan
Parserahan naribur
Naribur mangahut tikki

Huingot do sanduduk
Sanduduk matipul
Matipul dabu
Dabu tu gara
Gara marrara
Marrara robean namago uli
Uli namaporus

Nang porhis manggempori
Manggempori di dakka
Dakka ni sanduduk
Maleu bulungna
Bulungna marurus
Marurus marlulun timus
Timus ni pamangus

Toho dang lupa ahu
Ahu uju menek
Menek di huta
Huta namora
Namora di roha
Roha nauli
Nauli bulus

Tu roha ro husip
Husip asa mulak
Mulak manikkir porlak
Porlak natarulang
Tarulang leleng
Leleng so mulak

3 Agustus 2016

NATUTU TU NALILU

Tutu marsitutu, ido Ho Tuhan
Lilu marulak-ulak lilu, ima ahu Tuhan

Ate-ate namatopak, Ho do padomuhon
Pusu-pusu namagotap, Ho do namamudun
Roha marutrut alani muruk
Las ni roha maropuk alani muruk
Ria matolpang alani holang
Ho do sai panorang
Pamonang tu akka parporang
Tuhan, Ho ma gabe ondolan

Daon ni namagopu
Daon asa malum
Ido Ho Tuhan
Naholip di simalolong
Alai tu tondi sai tong manggomgom

Ido Ho Tuhan, na ro di nasa arsak
Pardongan tu parjalang naso boi dope mulak

Maporus tu Ho do sude nasa roha
Namaniak, naborat, jala nagolap
Asa palambok Tuhan, paneang Tuhan, patorang Tuhan

Maradu tu Ho do parroha natutu
Asa tadingma ngolu nasusa di sihadaoan

Dung tubu Ho Tuhan
Borngin i gabe torang
Ho do sulu namagolu
Di sandok namarroha asa unang lilu

Peak di panggagatan do nian
Ditopot holan parmahan do nian
Di bara ni pinahan do nian
Lesem hian do nian
Alai Ho ma gabe dalan hangoluan
Parmahan ni nasa jolma
Abara pangunsandean ni akka naloja
Ho ma i Tuhan

Pulik-pulik ido somal umbahen holip
Dang songoni Ho Tuhan
Sude do toguon-Mu asa unang adong nalilu
Unang adong mago jala magopu
Jala talu maralohon musu

Burik-burik ido rohakku tu Ho Tuhan
Sipata ganggu, sipata lilu

Pilit-pilit ido ngolukku Tuhan
Alai dang laho Ho
Lan gabe jumonok ro
Manumpahi simanjujung, mengebati tondikku
Asa saut ma ahu Tuhan
Marbulusan di holong-Mu
Asa lasma ahu
Torangma ahu

Tutu marsitutu, ido Ho Tuhan
Lilu marulak-ulak lilu, ima ahu Tuhan

ENDE NI TONDI

Dang tarpatupa ahu be hata naganjang

Dainang haholongan, 

nasai manghatindanghon nadenggan

Dang tarpatupa ahu be hape mangapus ilum

Namadekdek, bonom tu tano, dung i mago

Dang tarpaulak ahu be tikki naung tarbolus

Alai unangma i gabe hasesega torus

Tung satongkin nai pe tikkinta padua-dua

Tahaseanghon ma i arian i

Nang di bonomni mataniari

Tu ho pe boru, boru panggoaranku

Takkup ma holongku, sian on sahat tu haduan

Golom ma i, sian on sahat tu namagodang

Marisuang nunga hata-hata hape

Marisuang panolsolion naro di topi ni parmaraan

Marisuang pangalaho naso suman

Tu dainang, parsonduk bolon, nang boru panggoaran

Naeng dohononku do nian, naeng hubonom sasudena i

Naso ture naso une, di lakka, di hata, nang di roha

Saganjang dalan naung tadalani, 

lobi ganjang naung tahilala

Paet jala tonggi, asom jala langu, inang pangintubu,

parsonduk bolonhu, nang boru panggoaranku

Pamanganhu sai tarkincu, andora sai manosak,

Simangido songon tarlilit andor narata

Boha nama bagianhu?

Nion ma endekku tu hamu

Ende ni tondi alani pamatang nunga lilu

Marende ma ho tondikku, pasahat alu-alukku

Marende ma ho tondikku, pasahat hadirionhu

Marende ma ho tondikku, pasahat hamubaonhu

Marende ma ho tondikku, tu tondi ni dainang

pardijabu, nang boru panggoaranku

09 Nopember 2014

BEGEMA I INONG

Tung so tarjou ahu be ho inong
Tung so tarhirap ahu be ho inong
Hape godang sialuhonon
Godang sipasahaton
Godang halungunon
Godang haliluon
Godang panolsolion

Tung so tarjou ahu be ho inong
Tung so tarhirap ahu be ho inong
Nion gellengmu nasaleleng on mangagohon holong
Holongmu inong
Holong nasai tiris dinasa uashu
Saganjang ngolukku
Manumpaki simanjujunghu

Bege, begema inong
Ende nalungun di tonga borngin nahohom
Bege, begema inong
Hupasahat tonakku
Hupasahat holongku
Hupasahat siukhu
Hupasahat sulang-sulanghu
Hupasahat las ni rohakku
Hupasahat lungunku
Hupasahat panolsolionku

Bege, bege, begema inong
Ende ni sulim bulu
Namangendehon hadirionku
Naung mulak sian nalilu

18 Oktober 2014
www.patuamangunsong.blogspot.com

TARPAIMA

Taripar dolok pe ho
sai tading do hodok
di nakkokan naparjolo
ido sai manjou ho
asa mulak patiurhon holom
tu tano dohot natua-tua
namangasahon nasa holong

Taripar tao pe ho
sai tading do ilu
namanetek tu galumbang
di topi ni solu
ido sai manjou ho
asa mulak
asa rap hita
mardaunpogu
di toru turpuk ni gaol
jonokhon bona ni bulu

10 Juni 2014

PODA NI PARSINUAN

Dang sitiop hujur hita amang
Alai parroha napiccur
Namangondolhon hatigoran
Di ruhut-ruhut ni hangoluan
Napatindangkon hasintongan
Di ganup roha namatolpangan

Hata ma on
Alai gabe arta di parjalangan
Nonang ma on
Alai gabe ulos tu nasa pamatang

HATA TONA

Amang, mataniari ingkon do sundut

Naung bincar jala torang olo do tong mangihut sundut

Tung di purba pe i manang irisanna pe i

Tong do dohot sundut

Amang, parateatehon siala namartumbur

Di sada ari so haolatan ibana marbulung

Lomona do sian tubu sahat tu namarujung

Songonima ngolu, ngolunta amang

Sada tikki bincar, sada tikki torang

Sada tikki sundut

Sada tikki martumbur

Sada tikki marbulung

Jala sada tikki maburbur

Songon hita amang, sada tikki marpudun

Laon ni ari malamun

Tikki dang taralo hita, amang

Oloan do ihuthonon sotung mara ro marsitimbukan

Jala saganjang tikki nasotaralo

Nadenggan ulaon, natama hatahonon, nature parrohaon

Amang, amang buha bajukku

Molo sundut mataniarikku

Molo marurus bulung-bulungku

Molo sahat nang tikkikku

Ingotma tonakku

Boanonmu ahu mulak tu ingananni pusu-pusukku

Asa jonok ahu minum tu mata mual di haetehonku

Asa lambok simanjujung

Marbattal tano namangaramoti sandok ngolukku

Asa lambas panghilalaanku

Ture sonang partondionku

Ture torang hajolmaonku

4 Desember 2013