HUINGOT HO

Tompu ro ho di simalolongku 

Soaram diboan alogo tu sipareonku 

Engkelmi taringot muse 

Ujui rap hita dope 

Dang huboto alana iboto 

Nataringot do ho ra tongtong 

Ra alani alogo borngin 

Manang bulan narumondang 

Dang adong lapatanna be ito 

Nunga marrongkap ni tondi ho 

Marbagas marjabu naimbaru 

Hita naujui pasombu ma salpu

SABA RIMBA

Bidang saba nami di sabarimba 

Jonok mai tu saba Napa 

Diholangi sada dolok nama 

Ualu galung nabalga 

Unggodang sian nadeba 

Lan tingki roma jea 

Diumbang aek sudena 

Da tinggal ma satonga galung 

Maup 

Ia aek on sian Lobu ro 

Mamolusi pansur Pakkat 

Somalna metmet do 

Alai ima tingkina 

Balga hian parsahalian 

Maup ma saba nami 

Saba rimba

TU HO INANG

Tarhirim roha tu ho inang 

Satongkin nangkin hira mulak ahu 

Marnida ho di tonga saba 

Marbabo duhut nalomak 

Martujung ulos hitir-hitir 

Mangalo singit mata ni ari 

Palojahu ra ahu inang 

Dang taralo loja ni pamatang 

Godang boban ni parkarejoan 

Sipata tubu roha mangarsak 

Sai naeng so sian halojaon 

Alai so boi ahu laho 

Porlu sihumisik tongoson tu hamu 

Tarhirim roha tu ho 

Alai sihumisik porlu di hamu

PORSEA DO AHU

Porsea do ahu tu huasom 

Balga situtu 

Ala sian gelleng hutanda Ho 

Marhite jamita nang ende 

Minggu manogot 

Alai di pudi ari on 

Songon ganggu roha 

Molo tutu marhuaso Ho 

Boasa adong dope porang 

Adong nasomangan 

Adong perusahaan naholit 

Adong wakil direktur nasongon padidit 

Tung pe i 

Porsea do ahu

MOLO ADONG NASALA

Molo tung adong nasala nahubahen 

Manganju ma rohami tu ahu hasian 

Molo ho maninggalhon ahu 

Tudia nama laho 

Holan ho nama ito di rohangki 

Holan ho do di pusu-pusungki 

Roma ho tu ahu asa huanju ho 

Jala manganju ho di ahu ito 

Molo tung adong nasala nahubahen 

Manganju ma ho di sudena pambahenanhi 

Sotung laho ho 

Sotung laho ho 

Sian ahu ito 

Holan ho di rohangki 

Manganju ho di ahu

HATAHON TU AHU

Hatahonma tu ahu haholongan 

Atik adong nasala nahubahen 

Ai molo so dihatahon ho 

Bohama bahenonhu 

Manganju rohami 

Unangbe sai marsak ho ito 

Tarboan annon di nipingki olo 

Tung hatahon ma tu ahu 

Naponjot di rohami 

Asa talului dalan mangalaosi i 

Mengkel ma jo ho 

Mengkel ma jo ho 

Asa huida bohim nauli i 

Bereng matanghon 

Bereng matanghon 

Asa huida isi ni rohami 

Bereng simalolonghon 

Bereng simalolonghon 

Tigor tigor 

Asa hubereng isi ni rohami

MASIHOL AHU TU HO

Masihol ahu tu ho 

Nunga saleleng on 

Dang pajumpang hita 

Di tao natio 

Huingot dope ho 

Uju rap dohot ho 

Bajum namarhillong i 

Hona mata ni ari i 

Di botarion 

Ahu naeng pajumpang dohot ho 

Ro ma ho tu ahu 

Dison do ahu paimahon ho 

Di botari on tung roma ho jonok 

Naeng hutiop tanganmi 

Naeng huapus bohimi 

Hasian masihol ahu tu ho

BOHIM NASOHUIDA

Nion paduaribu taonhon 

Ro Ho sian harangan manopot huta 

Tungpe soada jolma 

Hundul ho di toru ni hariara 

Gabe maup sude mara 

Ai dang loja Ho Tuhan 

Tong hundul sadari manipat 

So adong jolma mangaliat 

Alai tahe 

Tungpe duaribu taon 

Ho di huta nami 

Dada hutaili bohim 

Ninna halak marmudar-mudar 

Ninna do di sipareon 

Di simalolong so huida sian naholom 

Debata 

Autsura tarida bohim 

Ra olo huapus ilum 

Hupainte i hohom di naholom 

Sahat Ho tu natarpodom 

Di horja ni sibolis bolon 

Debata 

Aut sura boi huida bohim 

Ra olo huapus ilum 

Huapus bohim

TARINGOT TU HAUMA (2)

Uju i 

Dipapungu Uma batu ni salak sian dalan 

Diboan i tu hauma 

Dipandenggur di tonga ni hapea 

Dang tuntu jarakna 

Jumpang arina 

Tubu metmet 

Jumpang tingkina 

Marparbue sada-sada 

Dang piga tonggina 

Ra ala linggom ni hapea 

Sada tingki 

Sada tu sada-sada 

Ditabai hapea 

Di naasing tingki 

Gabe ramos salakna 

Gabe gumodang tonggina 

 

Di lan tingki 

Ro partiga-tiga tu tonga ni hauma 

Manuhor margoni-goni 

Ummarga sian deba

TARINGOT TU HAUMA (1)

Dua batu ma i sian huta 

Dompak Pulobali Sinamo dibahen goarna 

Adong hauma nami disi 

Godang salak nang bona ni hapea 

Molo sian pansur Hauagong ro 

Mamolus annon kobun salak Pardosi 

Sibahen bonsir parPakkat mananom salak 

Di tonga nai bona ni bulu di siamun 

Dung i mamolus hapea ni bapauda Parlapo Sabas di pasar 

 Adong ma i annon parbalokan 

Manimbuk ma otik Ima pintu hauma nami 

Antar di hambirang bona ni bulu 

Topat di parbalokan  

Adong sopo metmet jonok pintu i 

Jotjot ahu manutung gadong disi 

Huhut modom-modom 

Ue, tabo nai marholom-holom

AMPARATUS

Bonana songon andor 

Mangaliat-liat di bona ni manang aha 

Sipata hapea sipata dapdap 

Parbuena remet hibul 

Tata rata malamun rara 

Lobi malamun birong

Tonggi daina 

Alai da siallangon holan sisikna 

Molo dohot batuna 

Mago tonggina

SINGKOLAKKU RK

Dung dua taon di Bandung 

Mulak ahu tu Amang Inang 

Tu huta i tu Pakkat 

Didaptarhon ahu tu SD RK 

Lulus tu SMP RK sada 

Masuk SMP RK dua ala bada kalas tolu 

Tammat tu SMA RK 

Singkolakku RK SD rodi SMA 

Sada inganan sudena 

Rap gareja ruma sakkit 

Susteran nang pastoran 

Dung SMA ahu 

Jongjong singkola TK

HUTA JABU DOHOT TAMBAK

Mamolus ho sian huta nami 

Maradi satongkin di simpang opat 

Di pudim tugu Sumerham 

Tu joloan huta Tukka 

Tu siamun Parlilitan 

Jabunami dompak Parlilitan 

Jonok HKBP 

Jonok gareja i bona ni tarutung 

Balga situtu 

Rimbur bulungna 

Jabu matua nami sian hau 

Ujui martorumbara 

Sada tingki ditambai simin 

Satonga beton 

Tambak di lambung jabu 

Udean ni Ompung sian Amang

Jonok tu dapur 

Molo mulak ahu 

Martangiang di si 

Molo borhat pe 

Papimpit mata di si 

28 Nopember 2006 

*12 Malam. Menjelang Ulang Tahun.

SORDAK

Sordak ni pintu solat di para-para 

Ra dirimpu soban madabu 

Naeng ditutung lompahon lambuk 

Hancit simanjujung ni ama 

Tajom ingotna 

Gantung dope uju buha-buha ijuk

Sala ni si Ucok do antong 

Papindahon partahaan nakoring 

Dirimpu soban sordak i 

Diampehon tu para-para 

Tangkas ma antong hancit ulu mangaluli 

15 Nopember 2006

MARSAK ROHA

Marsak roha mangida namasa 

Dongan sasingkola nunga hasea 

Denggan karejona 

Sumalin ma ahu 

Tong marsada-sada 

Marhancit di Jakarta 

Soada sihumisik 

Mangan manaon ila 

Di jabu nabungka pintuna 

Mangido asi ni roha 

O Debata ni naporsea 

Dia do las ni roha tu ahu 

Didia ditabunihon ho 

Nunga palojahu ahu mardalan 

Nunga pauashu sialap ingkau 

Naeng mandurgok aek sitio-tio 

Tungpe ditabunihon partanduk pitu 

Paboa ma tu ahu Tuhan 

Unang pasombu ahu mate karing 

Dang marimbar tu jolma naasing 

Naso porsea tu huasom 

Ai molo sarupa ahu tu nasida 

Aha imbarhu hape naporsea tu Ho 

Nunga marsak Ahu Tuhan 

Marsak roha 

Simalolong marrara 

Tangis marbuni-buni 

Sipata ro husip laho maningkot 

Ro ma Tuhan 

Tung marsak rohakku 

19 Oktober 2006

SALAK PAKKAT

Sada hasolomanhu 

Salak Pakkat natonggi 

Sisikna marduri-duri 

Batangna pe songoni 

Adong sisada 

Piga sidua-dua 

Godang sitolo-tolu 

Siopat silima sionom pe adong 

Tingki poso pe i 

Batuna boi panganon 

Bontar rupana 

Damor-damor di ipon 

Kobun salak nami 

Di holang ni hapea 

Rata bulungna 

Balga borasna 

Tajom durina 

 Gabe naeng mulak ahu tu Pakkat 

Laho mangan salak 

Raphon dongan tingki dakdanak 

Horas Pakkat 

Hidup salak 16 Oktober 2006

NAPA - SITAHUIS

Molo ro ho tu huta nami 

Pakkat nauli i 

Jumpangmu sada binanga 

Di dolok digoari Napa 

Dungkan toru Sitahuis 

Sasintongna marsada do aekna 

Alai asa mura manggoari ruasna 

Gabe dibahen ma songoni 

Sitahuis dohot Napa 

Ari Minggu ribur do on 

Dung mulak sian gareja 

Laho halak manghail mamoluk nang manjala 

Gomodangan tahe marlangei 

Manimbuk sian bona ni hau 

Mamirsaki aekna 

Marbubum soarana 

Alai balga do biarhu 

Di hametmetan holan manonton do ahu 

Hundul sambing di topi ni aek 

Ala mabiar tu nabagas 

Mamoluk mabiar tu ulok 

Manjala dang huboto 

Manghail mabiar tu gea 

 Nang pe songoni 

Lomo do rohangku tu si 

Napa Sitahuis i

SAMPURAN SIPULAK

Ari Minggu ari holang 

Ahu raphon dongan 

Marmean tu sampuran 

Mandiori ragam ni hotang 

Dang di sampuran i hotang i 

Alai di tombak sahumaliang Sipulak i 

Dung sae naniluluan 

Hudapoti hami baba ni sampuran 

Dao hami mijur 

Sian ginjang batu sabalga tangan 

Sahat di toru sabalga horbo 

Aek godang Temba di son tong madabu 

Dung mardomu tu Sirahar 

Gabe so jangko balgana 

Marbubur soarana 

Marhapas-hapas aekna 

Sipulak marbubur 

So jangko balgana 

03 Oktober 2006

NUNGA RO HO INANG

Nunga ro ho Inang 

Raphon alu-alu na so dihatahon 

Alai simalolong manggurathon 

Marsak roham 

Paida buhabaju marsitaonan 

Dang pangidoan i 

Sapata do mandok 

Lapung ingkon oloan 

Pagodang ma roham 

Ala adong sada dalan 

Manginsolat di sada inganan 

Buni nuaeng on 

Alai haduan manolhas sipareon 

Nunga ro ho Inang 

Unang pola marsak roham. 19 September 2006

BORU SILEBAN

Sian habinsaran ompuna ro 

Taripar aek margalumbang natimbo 

Tubu ibana di son 

Di tano na rap taingani on 

Pusorna tanom di son 

Alai husungkun Dainang 

Boha do roham 

Aut ibana ma parumaenmu 

Aha pandokmu 

Dijalo ho do songon boru ni raja 

Tama do roham mamereng ibana di halangulu 

Raphon tubum marbagas marumatangga 

Hatahon ma Inang

Molo adong na solot di roham 

Hujalo doi 

Ra, adong podam naung hulupahon 

Ala martaon ahu di ranto 

Gabe lupa hatam 

Hatahon ma Inang 

Anggiat boi huoloi tonam 

Molo pe so boi 

Asa huanju roham 

Jala marpanganju roham 

Tu nanaeng parumaenmon 

Boru sileban on 

Na sipit mata on 

Hatahon Inang 

09 September 2006