NUNGA HUPILLIT HO

Hupillit ho haholongan 

Nagabe dongan saurmatua 

Holongmi mian di roha 

Holongki dangbe muba 

Margogo pasu-pasu 

Saripe sian sadarion 

Nunga mangalakka sahat tuson 

Langgatan bagasjoro on 

Anggiat uli holong 

Tumatua tu saurmatua 

Naung sahat hita dison 

Dang marujung tahe pardalanon 

Mula do on 

Nian lam margogo 

Margodang uli nadenggan naretta 

Nunga sahat hita dison 

Hupillit ho di puccuk ni taon 

Note: Selamat menempuh hidup baru, Marietta Purba & Agus Marbun. 

HORAS TU HO NANAENG RO

Ro haba-haba manggogo, 

mangaroro tu tombak longo-longo. 

Torus ibana tu jampalan nagok horbo. 

Sude humordit, humordit tarngongo. 

Onma ujung ni sandok tano 

Naeng ro Ho hape mardongan alogo,

alai haba-haba patanda diri jumolo.

Horas ma Anak nasian surgo, 

anggiat gabe gok bagasjoro.

Dakdanak marayat-ayat,

nang boa-boru naposo, 

natuatua pajojor hata, 

hata ni sandok bangso. 

Ro haba-haba manggogo, 

Horas jala gabe tu Ho nanaeng ro.

HUPAIMA HO DI HUTANAMI

Dongan Hupaima ho di hutanami 

Pakkat Hauagong tano nauli 

Sipalas roha sipalas tondi 

Jampalan nalomak mangerbang buti 

Dolok tombak paintehon marsorisori 

Lumobi Pinapan najogi 

Marimongimong manjukjuk langit portibi 

Sampuran marbubur 

Aek godang marribur 

Jolma pangisi namalo martutur 

Dakdanak tung tibu simbur 

Dongan Hupaima ho di hutanami 

Berengonmu marbue haramonting 

Apparatus marrara 

Raba-raba natonggi 

Harakka margoni-goni 

Tungir-tungir marlobi-lobi 

Tanggulon di mata mual naso martopitopi 

Tu balian hita muse

Manuruk hapea manopot salak nasae

Tarutung nahulpik rambutan naramos 

Tuak bagot doras mandodos 

Dongan Tu si ahu mulak haduan 

Haduan huharikkothon 

Di si sonang tarpodom

DALAN PARHANSITAN

Hulaosi dalan parhansitan 

Manopot Pakkat Hauagong hatubuan 

Tong songon nahinan 

Batu marpudigil marrerak di topi lombang 

Lokko-lokko molo ro udan mangerbang 

Tong songon nahinan 

Mangalaosi saba 

Matiti nabidang 

Husukkun supir Sanggul Mas namarniang 

Piga jom sian on amang 

Tolu jom anaha molo somatolbak dalan 

Ue... Tong songon nahinan 

Tolu jom mandalani opatpulu ualu batu 

Dang adong nahurang 

Tahe gabe martamba godang 

Tamba godang jom 

Tamba minggot simanjujung 

Tamba hancit nang dugul-dugul 

Naung sampulu taon hape dongan 

Marsirang hita di topi dalan 

Dalan namanaruhon hita namarsihaholongan 

Sega tatadinghon 

Tamba sega hudapothon 

Dalan parhansitan 

Andigan ho denggan 

Asa mulak donganhi 

Dang mabiar magulang tu lombang 

Hipas sahat tu huta naherbang 

 Dalan parhansitan 

Andigan

NUNGA HUTONGOS PARSINAPURANMU INANG

Nunga hutongos saotik inang 

Pasinapuranmu mai nian 

Hubege nunga piga minggu ho dang tu onan 

Ala so ada sihumisik tarboan 

Gabe lungun rohakku di sihadaoan 

Naeng do nian ahu habang 

Manolothon tu puro-puro mi piga tongosan 

On ma jo tikkina inang 

Sian pos ma jolo dalanna habang 

Anggiat las roham nang damang 

Marbagi ho inang da 

Lehon nian pasitimbaho ni Amang 

Asa tabo idaon hamu di ari potang 

Marisap rap marnapuran 

Manatap Sanggulmas borhat tu Medan

MULAK PE AHU

Mata mual manjou sian nadao 

Mulak pe ahu 

Molo ido pinangido ni tano 

Mulak pe ahu 

Molo ido pio-pio ni tano

HOLSO

Naeng huambukkon holso nabolon 

Bondutma sude sitaonon 

Raja ni borngin bursikhon bura-burami 

Asa poltak mata ni napijom 

Ahu pe dang be modom

UNANG MARBADAI BE HITA ANGGI

Nunga mangkuling silonging di botarion 

Sian bona ni hapea an do soarana manjou holom 

Mulak amang parjolo 

Ninna dainang tu ahu 

Togihon anggi ibotomi 

Dung sahat di jabu lompa indahan amang 

Dang pola tutungonmu gambas amang 

Adong dope lobi-lobitta naarian 

Ahu pe annon mamboan 

Huboto do loja ni inang dohot amangkon 

Tung pe ari nunga holom 

Ingkon udutonna bogas martue i 

Saotik nai eme di topian i 

Gabe lungun rohakki di si 

Ai tung holong natuatua on 

Hape hami sai namarbadai 

Huompa anggi siampudani 

Nunga modom ibana nangkin 

Gabe nanget huampehon di tanggurungki 

Sotung hehe ibana 

Gabe tangis muse 

Hutogihon ibotokki 

Dipudikku ibana mangihuthon 

Tubu di rohakku panolsolion 

Pabijalhu do ahu tu ibotokkon 

Hupaso ma mangalakka 

Ibana pe so dang marhata 

Ito 

Dibereng hita do loja ni amang nang inang i 

Unang be sai marbadai hita da 

Gabe susa annon roha nasida 

Olo ito da? 

Sip do nian ibana 

Alai ditiop ma tanganku 

Manetek iluna huhut dihaol ahu

MALE MAMBUTBUT SAME

Tardingkan topi gadu-gadu 

Hundul ahu dang marsandean 

Hutatap dompak baribaan 

Atik boha ro tugo arian on 

Male tutu siubeon 

Mambutbut same dang hatorushon

Sai tong hutatap tu bariba an 

Dompak dolok-dolok dalan mulak tu huta 

Songgot ma ro tu roha 

Ai boi do ra nipangan garikkau naposo 

Tongginai boi ra mandaoni hamaleon 

Huranapima bona ni gadong naummet-met 

Huumpat margogo pamatang nagale 

Garikkau i maponggol satonga 

Tipul-tipul nai dang huukkar be 

Lobinaon ma huharutus 

Dang piga tikki 

Dung sae hugatngat gadong sisamponggol i 

Ro ma inang mamboan buntal-buntal 

Indahan di bagasan rap dekke janggut-janggut 

Hubondut mai asa hatop ture 

Susa nai hape namale

SUSU TAON BARU

Adong nasai hupainte di ujung ni taon 

Anggo sadari i ingkon hatop ahu modom 

Asa dungo di tonga borngin 

Parade diri hundul marhaliang 

Patolhas hata mangalaosi taon

Somal marsigulut ma ahu dohot anggi ibotokki 

Patarehon susu di galas nami be 

Mardongan ijur mardede-dede 

Mangarimangi tabo daina di rohana be 

Tungkanima kambang loyang narade

Geok do di roha molo huingot on 

Ue sahali sataon do boi songon on 

Minum susu di taon baru on

Rupani molo jumpa tingki ujung ni taon 

Dua nahupaima 

Taon naimbaru didongani susu taon baru

BORHAT AHU

Juljulanku nama langit an

Asa sahat ahu tu na nahuparsinta 

Dada naso adong holong tu Amang 

Manang holso tu Dainang

Haborhaton on nunga bagian

Pardalanan tu joloan on nunga ditontuhon 

Asa muba parngoluan 

Jala singkop naniluluan

Borhat ma ahu Amang 

Dang lupa ahu di hapeatta i 

Nang bona ni tarutung na sabatang i 

Tangkas di rohakku do bulu parik i

Borhat ma ahu Inang

Di hokkopanhu do lompa-lompami 

Nang aek natio di manogot i 

Ido margogoi tondikki 

Manopot humaliang parserahani

BORHAT MA HO AMANG

Borhatma ho Amang 

Mangalakka ma simanjojakmi 

Tu tano parserahan nahumaliang 

Patudu habangsoonta 

Marbisuk ma ho jala marroha

Tung tinggal pe ahu amang 

Hujaga do tali pusokmi 

Alai sombakkuma nahot 

Tung so lupa ho nian 

Di pingganta kaleng i 

Cerekta naso adong be sitiopannai 

Nang bona ni kuenitta i

HUINGOT HO

Tompu ro ho di simalolongku 

Soaram diboan alogo tu sipareonku 

Engkelmi taringot muse 

Ujui rap hita dope 

Dang huboto alana iboto 

Nataringot do ho ra tongtong 

Ra alani alogo borngin 

Manang bulan narumondang 

Dang adong lapatanna be ito 

Nunga marrongkap ni tondi ho 

Marbagas marjabu naimbaru 

Hita naujui pasombu ma salpu

SABA RIMBA

Bidang saba nami di sabarimba 

Jonok mai tu saba Napa 

Diholangi sada dolok nama 

Ualu galung nabalga 

Unggodang sian nadeba 

Lan tingki roma jea 

Diumbang aek sudena 

Da tinggal ma satonga galung 

Maup 

Ia aek on sian Lobu ro 

Mamolusi pansur Pakkat 

Somalna metmet do 

Alai ima tingkina 

Balga hian parsahalian 

Maup ma saba nami 

Saba rimba

TU HO INANG

Tarhirim roha tu ho inang 

Satongkin nangkin hira mulak ahu 

Marnida ho di tonga saba 

Marbabo duhut nalomak 

Martujung ulos hitir-hitir 

Mangalo singit mata ni ari 

Palojahu ra ahu inang 

Dang taralo loja ni pamatang 

Godang boban ni parkarejoan 

Sipata tubu roha mangarsak 

Sai naeng so sian halojaon 

Alai so boi ahu laho 

Porlu sihumisik tongoson tu hamu 

Tarhirim roha tu ho 

Alai sihumisik porlu di hamu

PORSEA DO AHU

Porsea do ahu tu huasom 

Balga situtu 

Ala sian gelleng hutanda Ho 

Marhite jamita nang ende 

Minggu manogot 

Alai di pudi ari on 

Songon ganggu roha 

Molo tutu marhuaso Ho 

Boasa adong dope porang 

Adong nasomangan 

Adong perusahaan naholit 

Adong wakil direktur nasongon padidit 

Tung pe i 

Porsea do ahu

MOLO ADONG NASALA

Molo tung adong nasala nahubahen 

Manganju ma rohami tu ahu hasian 

Molo ho maninggalhon ahu 

Tudia nama laho 

Holan ho nama ito di rohangki 

Holan ho do di pusu-pusungki 

Roma ho tu ahu asa huanju ho 

Jala manganju ho di ahu ito 

Molo tung adong nasala nahubahen 

Manganju ma ho di sudena pambahenanhi 

Sotung laho ho 

Sotung laho ho 

Sian ahu ito 

Holan ho di rohangki 

Manganju ho di ahu

HATAHON TU AHU

Hatahonma tu ahu haholongan 

Atik adong nasala nahubahen 

Ai molo so dihatahon ho 

Bohama bahenonhu 

Manganju rohami 

Unangbe sai marsak ho ito 

Tarboan annon di nipingki olo 

Tung hatahon ma tu ahu 

Naponjot di rohami 

Asa talului dalan mangalaosi i 

Mengkel ma jo ho 

Mengkel ma jo ho 

Asa huida bohim nauli i 

Bereng matanghon 

Bereng matanghon 

Asa huida isi ni rohami 

Bereng simalolonghon 

Bereng simalolonghon 

Tigor tigor 

Asa hubereng isi ni rohami

MASIHOL AHU TU HO

Masihol ahu tu ho 

Nunga saleleng on 

Dang pajumpang hita 

Di tao natio 

Huingot dope ho 

Uju rap dohot ho 

Bajum namarhillong i 

Hona mata ni ari i 

Di botarion 

Ahu naeng pajumpang dohot ho 

Ro ma ho tu ahu 

Dison do ahu paimahon ho 

Di botari on tung roma ho jonok 

Naeng hutiop tanganmi 

Naeng huapus bohimi 

Hasian masihol ahu tu ho

BOHIM NASOHUIDA

Nion paduaribu taonhon 

Ro Ho sian harangan manopot huta 

Tungpe soada jolma 

Hundul ho di toru ni hariara 

Gabe maup sude mara 

Ai dang loja Ho Tuhan 

Tong hundul sadari manipat 

So adong jolma mangaliat 

Alai tahe 

Tungpe duaribu taon 

Ho di huta nami 

Dada hutaili bohim 

Ninna halak marmudar-mudar 

Ninna do di sipareon 

Di simalolong so huida sian naholom 

Debata 

Autsura tarida bohim 

Ra olo huapus ilum 

Hupainte i hohom di naholom 

Sahat Ho tu natarpodom 

Di horja ni sibolis bolon 

Debata 

Aut sura boi huida bohim 

Ra olo huapus ilum 

Huapus bohim

TARINGOT TU HAUMA (2)

Uju i 

Dipapungu Uma batu ni salak sian dalan 

Diboan i tu hauma 

Dipandenggur di tonga ni hapea 

Dang tuntu jarakna 

Jumpang arina 

Tubu metmet 

Jumpang tingkina 

Marparbue sada-sada 

Dang piga tonggina 

Ra ala linggom ni hapea 

Sada tingki 

Sada tu sada-sada 

Ditabai hapea 

Di naasing tingki 

Gabe ramos salakna 

Gabe gumodang tonggina 

 

Di lan tingki 

Ro partiga-tiga tu tonga ni hauma 

Manuhor margoni-goni 

Ummarga sian deba

TARINGOT TU HAUMA (1)

Dua batu ma i sian huta 

Dompak Pulobali Sinamo dibahen goarna 

Adong hauma nami disi 

Godang salak nang bona ni hapea 

Molo sian pansur Hauagong ro 

Mamolus annon kobun salak Pardosi 

Sibahen bonsir parPakkat mananom salak 

Di tonga nai bona ni bulu di siamun 

Dung i mamolus hapea ni bapauda Parlapo Sabas di pasar 

 Adong ma i annon parbalokan 

Manimbuk ma otik Ima pintu hauma nami 

Antar di hambirang bona ni bulu 

Topat di parbalokan  

Adong sopo metmet jonok pintu i 

Jotjot ahu manutung gadong disi 

Huhut modom-modom 

Ue, tabo nai marholom-holom

AMPARATUS

Bonana songon andor 

Mangaliat-liat di bona ni manang aha 

Sipata hapea sipata dapdap 

Parbuena remet hibul 

Tata rata malamun rara 

Lobi malamun birong

Tonggi daina 

Alai da siallangon holan sisikna 

Molo dohot batuna 

Mago tonggina

SINGKOLAKKU RK

Dung dua taon di Bandung 

Mulak ahu tu Amang Inang 

Tu huta i tu Pakkat 

Didaptarhon ahu tu SD RK 

Lulus tu SMP RK sada 

Masuk SMP RK dua ala bada kalas tolu 

Tammat tu SMA RK 

Singkolakku RK SD rodi SMA 

Sada inganan sudena 

Rap gareja ruma sakkit 

Susteran nang pastoran 

Dung SMA ahu 

Jongjong singkola TK