Molo so napu
Ompan ni manuk bahenon
Molo so diallang manuk
Tor tu palakka saburhonon
19 Nopember 2009
Video Puisi ada di: https://www.youtube.com/c/SimangunsongParkaroncong
MATITI TU SIRISI-RISI
Met-met dope uju i
Ari Minggu manogot ma tingkina
Ahu si Atas dohot iboto si Rona
Pagaranghon ate-ate
Mardalan pat mangalaosi saba
Marhite gadu-gadu
Saganjang ni Matiti tu Sirisi-risi
Di dalan huli natigor
Andorang so tuat mandege duhut
Hutuhor hami tolu gambolong namargula
On ma bohal nami saganjang dalan
Hubolus hami do piga huta nalanga
Holan piga-piga jabu do salumban
Alai nga lupa ahu angka goarna
Holan sada nama nahuingot
Lumban Janji molo so sala
Di huta on ruma Batak dope sudena
Diboto ho do aha nahutopot hami?
Turpuk bona ni pisang di sihadaoan
Ima Sirisi-risi
Nnina si Atas dohot si Rona
Anak ni Amanguda dohot boru ni Amangtua
Ditonga-tonga ni saba
Dobar ma udan haba-haba
Naeng tangis ma nian
Ai dang binoto tingkina sahat
Ompung nunga paintehon di huta
Otik-otik hutopik hamima gambolongna be
Hape sai tong male
Ai udan pe ngali muse
Gabe tambama namale
Nunga golap ari
Ipe sahat hami
Dung husungkun hami tu parbalian
Nanaeng mulang tu huta
Dipatudu ma dalan
Dung balga hami
Ahu tu Jakarta
Si Rona nunga muli atik tudia
Si Atas mangoli di Sirisi-risi tong maringanan
Matiti tu sirisi sai tong di parningotan
22 Nopember 2009
www.patuamangunsong.multiply.com
BOHA NAMAI BANGSO
Nambur nunga mago di bulung ni kopi
Boha namai bangso
Duhut Japang pe nunga melos
Boha namai bangso
Aek nunga suda
Uas nunga songon suga
Boha namai bangso
Dalan huli sidalanon dao dope
Boha namai bangso
Lokko-lokko dang hainum
Boha namai bangso
Bulung ni tusam so haallang
Boha namai bangso
Bona ni bagot dang be haagat
Boha namai bangso
Ate-ate nunga suda
Bilalang nunga marrara
Boha hian namai bangso
Bona ni haminjon dipasuda
Boha namai bangso
Boha hian namai bangso
18 Nopember 2009
www.patuamangunsong.multiply.com
MANAMBIL AILI
Togongonta sambil jonok tu bona ni hapea
Bunihon hillongnai unang tarida
Bulung-bulung dohot bustak
Ogoshon tu talinai
Unang mabiar aili i
Parrohahon manat tahe
Bogas ni aili do kan
Ai molo soi do
Dang marlapatan tatogong di son
Tinggalhononta sadarion
Manogotmai tingkiron
Holan golok ma boan
Lanja-lanja boi luluan
Ikkat-ikkatna sian siala bahenon
Marsogot borngin ribu lapo tabahen
Marsabur-sabur tuak inumon
Martambul aili balga-balga tanggoon
Asa tombus napolaon
Aili, sangkot ho di sambil da
Asa tombus di huta napolaon
16 Nopember 2009
www.patuamangunsong.multiply.com
RUGU-RUGU BIANG
Anaha,
lombuthon biang i
Mengor pinggol alani ributna
Gauangnai manogoi roha
Berengma neh
Nangpe kaing-kaing
Tong dope dilele nabalga i
Parbetengan ma ra i
Anaha,
dang hape holan sada
Godang nasida
Hape alona sameltek do balgana
Onma rugu-rugu biang
Godang hian mangalele sada
Anaha,
lombut ma biang i
Unang marrugu-rugu nasida di si
16 Nopember 2009
www.patuamangunsong.multiply.com
MARTUNJANG HODA
Dang hoda namarbadai
Molo didok martunjang hoda
Dakdanak do nasotargora
Martunjang di jampalan
Sahalakmai songon hoda
Molo didok martunjang hoda
Dakdanak do nasotargora
Martunjang di jampalan
Sahalakmai songon hoda
Sahalak nai diompa di tanggurungna
Sagogona manunjang alona
Molo dabu sian hoda
Ima partaluna
Sagogona manunjang alona
Molo dabu sian hoda
Ima partaluna
Lele...
Tunjang...
Arjang...
Lului tano natimbo
Tunjang sian ginjang
Tunjang...
Arjang...
Lului tano natimbo
Tunjang sian ginjang
Lele...
Tunjang...
Lului tano natimbo
Tunjang sampe galpang
Tunjang...
Lului tano natimbo
Tunjang sampe galpang
16 Nopember 2009
LAMPET GADONG
Lampet gadong
Lampet gadong
Surak ni si butet ditonga onan
Pakkat ari Senen do onan
Lampet gadong
Lampet gadong
Ditonga-tonga gulana
Ninna si butet mangulakhon
Topet di partiga abit dijouhon goarna
Butet boan ma jo tu son
Namanuhor otte parrengge-rengge
Sian Dolok Sanggul inang on mokmok jala bolon
Dilakkatima lampet gadong on
Sabondut do dibahen nunga mago
Toho di si dope si butet jongjong
Longang situtu mamerenghon
Dipadalan si butet tu parmanukan
Lampet gadong Lampet gadong
Di tonga-tonga gulana
Sambondut bahenon
28 September 2009
TANGIANG BORNGIN
Langkupa mangkuling satongkin nangkin
Songgot roha aha namasa ulaning
Hupareso parmulaan aha nasala
Biarhu do
Manang mara nanaeng ro
Hupahohom disugut kamar
Marlimpet rohangku tuginjang
Leleng dang martangiang
Ido ra mula ni biar
Dibagasan goar ni Ama
Dohot Anak
Dohot Tondi Porbadia
Amen
Tuhan
Dang pola hudok
Nungnga diboto ho be i akke
Amen
Dibagasan goar ni Ama
Dohot Anak
Dohot Tondi Porbadia
Amen
14 September 2009
SIHOL
Naung dao hita marsihadaoan
Sirang tano dibola binanga nabolak
Martubu dakka hasiholan
Tumorang di borngin nagolap
Putik bunga di potang mangerbang
Tongos tu ahu marhite sihol mangararat
Boti tibu rohakku habang
Tu ampuanmu dorpe manjojak sahat
Bereng nei anggala marrerak
Tading di topi balian bolak
Asa tarjou tondim
Tarjou tarhirim mangan
Tondim tarhirim tu alaman
PODA
Onma pardalanan nahuparsitta
Borhat mardongan poda
Nauli mangerbang
Posma nang di roha
Manat ahu mardalan
Manaili tu halausan
Asa ture di parjalangan
Podami amang inang
Manggohi roha mengihot hosa
Lamture lamtuhotna
Podami amang inang
Tukkot molo landit
Palito molo holom
Hariburon molo hohom
ATIRONGGA
Maratirongga ho dongan
Gorsing-gorsing sasilonmi
Hira markutek idaon i
Marpungu di alaman
Kammel unang boan
Sotung gulut parpadanan
Tole dogol bulung bunga atirongga
Saotik hapur napuran
Dung lamot dalhop tu sasilon ni tangan
Satongkin nai bereng disi
Gorsing sasilonmi
Gorsing jala uli
NUNGA HUPILLIT HO
Hupillit ho haholongan
Nagabe dongan saurmatua
Holongmi mian di roha
Holongki dangbe muba
Margogo pasu-pasu
Saripe sian sadarion
Nunga mangalakka sahat tuson
Langgatan bagasjoro on
Anggiat uli holong
Tumatua tu saurmatua
Naung sahat hita dison
Dang marujung tahe pardalanon
Mula do on
Nian lam margogo
Margodang uli nadenggan naretta
Nunga sahat hita dison
Hupillit ho di puccuk ni taon
Note:
Selamat menempuh hidup baru,
Marietta Purba & Agus Marbun.
HORAS TU HO NANAENG RO
Ro haba-haba manggogo,
mangaroro tu tombak longo-longo.
Torus ibana tu jampalan nagok horbo.
Sude humordit,
humordit tarngongo.
Onma ujung ni sandok tano
Naeng ro Ho hape mardongan alogo,
alai haba-haba patanda diri jumolo.
Horas ma Anak nasian surgo,
anggiat gabe gok bagasjoro.
Dakdanak marayat-ayat,
nang boa-boru naposo,
natuatua pajojor hata,
hata ni sandok bangso.
Ro haba-haba manggogo,
Horas jala gabe tu Ho nanaeng ro.
HUPAIMA HO DI HUTANAMI
Dongan
Hupaima ho di hutanami
Pakkat Hauagong tano nauli
Sipalas roha sipalas tondi
Jampalan nalomak mangerbang buti
Dolok tombak paintehon marsorisori
Lumobi Pinapan najogi
Marimongimong manjukjuk langit portibi
Sampuran marbubur
Aek godang marribur
Jolma pangisi namalo martutur
Dakdanak tung tibu simbur
Dongan
Hupaima ho di hutanami
Berengonmu marbue haramonting
Apparatus marrara
Raba-raba natonggi
Harakka margoni-goni
Tungir-tungir marlobi-lobi
Tanggulon di mata mual naso martopitopi
Tu balian hita muse
Manuruk hapea manopot salak nasae
Tarutung nahulpik rambutan naramos
Tuak bagot doras mandodos
Dongan
Tu si ahu mulak haduan
Haduan huharikkothon
Di si sonang tarpodom
DALAN PARHANSITAN
Hulaosi dalan parhansitan
Manopot Pakkat Hauagong hatubuan
Tong songon nahinan
Batu marpudigil marrerak di topi lombang
Lokko-lokko molo ro udan mangerbang
Tong songon nahinan
Mangalaosi saba
Matiti nabidang
Husukkun supir Sanggul Mas namarniang
Piga jom sian on amang
Tolu jom anaha molo somatolbak dalan
Ue...
Tong songon nahinan
Tolu jom mandalani opatpulu ualu batu
Dang adong nahurang
Tahe gabe martamba godang
Tamba godang jom
Tamba minggot simanjujung
Tamba hancit nang dugul-dugul
Naung sampulu taon hape dongan
Marsirang hita di topi dalan
Dalan namanaruhon hita namarsihaholongan
Sega tatadinghon
Tamba sega hudapothon
Dalan parhansitan
Andigan ho denggan
Asa mulak donganhi
Dang mabiar magulang tu lombang
Hipas sahat tu huta naherbang
Dalan parhansitan
Andigan
NUNGA HUTONGOS PARSINAPURANMU INANG
Nunga hutongos saotik inang
Pasinapuranmu mai nian
Hubege nunga piga minggu ho dang tu onan
Ala so ada sihumisik tarboan
Gabe lungun rohakku di sihadaoan
Naeng do nian ahu habang
Manolothon tu puro-puro mi piga tongosan
On ma jo tikkina inang
Sian pos ma jolo dalanna habang
Anggiat las roham nang damang
Marbagi ho inang da
Lehon nian pasitimbaho ni Amang
Asa tabo idaon hamu di ari potang
Marisap rap marnapuran
Manatap Sanggulmas borhat tu Medan
MULAK PE AHU
Mata mual manjou sian nadao
Mulak pe ahu
Molo ido pinangido ni tano
Mulak pe ahu
Molo ido pio-pio ni tano
HOLSO
Naeng huambukkon holso nabolon
Bondutma sude sitaonon
Raja ni borngin bursikhon bura-burami
Asa poltak mata ni napijom
Ahu pe dang be modom
UNANG MARBADAI BE HITA ANGGI
Nunga mangkuling silonging di botarion
Sian bona ni hapea an do soarana manjou holom
Mulak amang parjolo
Ninna dainang tu ahu
Togihon anggi ibotomi
Dung sahat di jabu lompa indahan amang
Dang pola tutungonmu gambas amang
Adong dope lobi-lobitta naarian
Ahu pe annon mamboan
Huboto do loja ni inang dohot amangkon
Tung pe ari nunga holom
Ingkon udutonna bogas martue i
Saotik nai eme di topian i
Gabe lungun rohakki di si
Ai tung holong natuatua on
Hape hami sai namarbadai
Huompa anggi siampudani
Nunga modom ibana nangkin
Gabe nanget huampehon di tanggurungki
Sotung hehe ibana
Gabe tangis muse
Hutogihon ibotokki
Dipudikku ibana mangihuthon
Tubu di rohakku panolsolion
Pabijalhu do ahu tu ibotokkon
Hupaso ma mangalakka
Ibana pe so dang marhata
Ito
Dibereng hita do loja ni amang nang inang i
Unang be sai marbadai hita da
Gabe susa annon roha nasida
Olo ito da?
Sip do nian ibana
Alai ditiop ma tanganku
Manetek iluna huhut dihaol ahu
MALE MAMBUTBUT SAME
Tardingkan topi gadu-gadu
Hundul ahu dang marsandean
Hutatap dompak baribaan
Atik boha ro tugo arian on
Male tutu siubeon
Mambutbut same dang hatorushon
Sai tong hutatap tu bariba an
Dompak dolok-dolok dalan mulak tu huta
Songgot ma ro tu roha
Ai boi do ra nipangan garikkau naposo
Tongginai boi ra mandaoni hamaleon
Huranapima bona ni gadong naummet-met
Huumpat margogo pamatang nagale
Garikkau i maponggol satonga
Tipul-tipul nai dang huukkar be
Lobinaon ma huharutus
Dang piga tikki
Dung sae hugatngat gadong sisamponggol i
Ro ma inang mamboan buntal-buntal
Indahan di bagasan rap dekke janggut-janggut
Hubondut mai asa hatop ture
Susa nai hape namale
Langganan:
Postingan (Atom)