PUISI BATAK | PODA NI PARSINUAN

Dang sitiop hujur hita amang
Alai parroha napiccur
Namangondolhon hatigoran
Di ruhut-ruhut ni hangoluan
Napatindangkon hasintongan
Di ganup roha namatolpangan

Hata ma on
Alai gabe arta di parjalangan
Nonang ma on
Alai gabe ulos tu nasa pamatang

PUISI BATAK | HATA TONA

Amang, mataniari ingkon do sundut

Naung bincar jala torang olo do tong mangihut sundut

Tung di purba pe i manang irisanna pe i

Tong do dohot sundut

Amang, parateatehon siala namartumbur

Di sada ari so haolatan ibana marbulung

Lomona do sian tubu sahat tu namarujung

Songonima ngolu, ngolunta amang

Sada tikki bincar, sada tikki torang

Sada tikki sundut

Sada tikki martumbur

Sada tikki marbulung

Jala sada tikki maburbur

Songon hita amang, sada tikki marpudun

Laon ni ari malamun

Tikki dang taralo hita, amang

Oloan do ihuthonon sotung mara ro marsitimbukan

Jala saganjang tikki nasotaralo

Nadenggan ulaon, natama hatahonon, nature parrohaon

Amang, amang buha bajukku

Molo sundut mataniarikku

Molo marurus bulung-bulungku

Molo sahat nang tikkikku

Ingotma tonakku

Boanonmu ahu mulak tu ingananni pusu-pusukku

Asa jonok ahu minum tu mata mual di haetehonku

Asa lambok simanjujung

Marbattal tano namangaramoti sandok ngolukku

Asa lambas panghilalaanku

Ture sonang partondionku

Ture torang hajolmaonku

4 Desember 2013

PUISI BATAK | PAHOMPU PANGGOARAN

Ro nama ompung-mu ucok,

paradema engkel-mu.

Ro nama ompung-mu ucok,

orui balga ni tangis-mu.

Molo diumma ho annon ucok,

umma muse huhut pagogoma engkel-mu.

Topotma harorona ucok,

di jolo ni pintu raphon inong-mu.

Jalang ompung-mu martangan siamun ucok,

asa ganda las ni roha dipartubu-mu,

ala pahompu siangkangan ho,

pahompu panggoaran ni ompung-mu.

Ro nama ompung-mu ucok,

pabalga sakku ni baju-mu.

27 September 2012

PUISI BATAK | NOKMA HO NOK ANAKHU

(Untuk Arthur Nature Simangunsong)

Nokma ho, nok anakku!

Papimpit simalolong,

pature pamatang laho modom,

ala ari borhat tu holom.

Nokma ho, nok anakku.

Nokma ho, nok anak panggoaranku!

Huabingpe ho dohot holong,

unang pola morong-orong,

asa pangintubum boi tarserom.

Nokma ho, nok anak panggoaranku!

Nokma ho, nokma naburju!

Unang tumatangis sambing,

ala pangintubum loja sian nangkin,

pature parpodomanmu, paune panarusanmu.

Nokma ho, nokma naburju!

Nokma ho, nok anakku,

anak panggoaranku, anakku naburju!

29 September 2012

PUISI BATAK | LUNGUNHU TU DAINONG

Paltak do pardompahan ni dainong di simanjujunghu,

marabur sagodang-godangna ilu, 

marningot sude pambahenanmu. 

Polado mangandung buhabajum di tonga borngin, 

alani lungun natarlobi. 

Huingot do di sada ari, 

hita nadua di tongani saba namahiang. 

Hos niari namandoit, umbahen hita misir tu sopo parlinggoman. 

Topek muse male siubeon, nunga tingkina martugo arian. 

Dainong manggalaki api, ahu meret otik mangalap aek tu mata ni mual.

Dang piga tingki,nunga rap hita muse di toru ni sopo,

paima masak boras satangkar. 

Paltak do parniulaanmu dainong di simanjujunghu, 

marabur sagodang-godangna ilu, 

marningot pambahenanmu. 

Dienet ho sada gambas sian para-para,

ditutung ho digara namarrara.

 Paltak do holongmu dainong di rohakku, 

marabur sagodang-godangna ilu, 

marningot tanda ni holongmu. 

Samponggol balga gambas i di ahu, 

laos holan sangotil ihurnaima dipeakhon ho di indahanmu.

“Ulunaima di ho amang, asa ulu ho haduan di hangoluanmu.

9 April 2012

PUISI BATAK | NUNGA GALE PAMATANG NAMI

Tungpe dao parjalanganmi anak hasianku,

tu luat sileban di bariba tao, ue mulak ma jo ho,  

bereng amang-inangmon naung gale so tolap be marbabo. 

Dang adong manogu-nogu hami. 

Di dalan nagolap tartuktuk hami dabu, 

di dalan nalandit tarsilincir hami dabu, 

dialan narahis tung so tolap hami, laos tong dabu 

Mulakma ho, mulakmajo ho, 

mulak ho sian huta nadao. 

Mulak ho mulakmajo ho, 

asa unang susa roha nami, 

dipadao muse holso. 

31 Nopember 2010

PUISI BATAK | DI HUTA ON DO AHU MAGODANG

Hasian, di huta on do ahu ditubuhon, 

jala di tano nabirong on do pusorhu ditanom. 

Berengmanei, godang bona ni bulu marhaliong, 

mangondingi angka bagas, asa nok hami modom. 

Hasian, di pansur on do ahu ganup ari maridi, 

asa ias pamatanghi laho singkola,

ias muse marsiajar di gareja. 

Berengmanei, godang turpuk bona ni siala nang angka raru, 

asa linggom mualnai sian mata ni ari, 

jala godang ure aeknai tung so maradi. 

Hasian, di harangan on do ahu jotjot manangke hau, 

mamola gabe soban, asa margara tataring mangalompa indahan, 

adong muse peakhonon di para-para, unang lola molo ro udan. 

Berengmanei, adong sopo parbornginan, 

molo marparbue tarutung, marjaga di si, 

unang ditabunihon angka dongan. 

Hasian, nangkokma saotiknai tu son,

sian dolok on, tatapma tu toruan,

ima ingananhu ditubuhon, 

posokhu ditanomhon, 

pamatang nang rohangku dipagodang. 

Hasian, topek dope ahu di roham? 

15 Nopember 2011

PUISI BATAK | JENGGA JENGGA

Jengga-jengga narata-rata, 

tabo allangon mardongan sira. 

Jengga-jengga narata-rata, tabo muse molo diduda, 

di losung hau naimbaru, 

malutuk-lutuk ditombom andalu. 

Tinamba lasiak mardongan sira, 

saor ma i di dila jala sapot di aru-aru. 

Jengga-jengga narata-rata, 

tungpe sapot di aru-aru, 

alai ijur tung soboi targora. 

06 Oktober 2011

PUISI BATAK | MAHIANG GADU-GADU

(Mahiang Maradu Tibu) 

Lasni ari manghujur tu simanjujung, 

simanjojak pe porhot manjojak gadu-gadu, 

mahiang lokko-lokko mahiang maradu tibu. 

Ue... unang ma nian api narokko naro, 

ai porlu dope ari manogot, porlu situtu. 

Naeng berengon hutakku namardinding dolok, 

naeng berengon hutakku namanjolohon aek godang, 

naeng berengon hutakku namartarup langit nabalau. 

Ninna damang di suratna naimbaru, 

mahiang gadu-gadu amang, 

mahiang maradu tibu. 

So binoto aha namasa amang, 

nunga loja hami manaburhon ilu. 

Atik boha sanga tingkim, 

berengma satongkin. 

Atik boha muse marlapatan, 

napinarsiajaranmu amang di sihadaoan.

5 September 2011

PUISI BATAK | MULAK TU BONA NI BARINGIN

(Lumban Bulbul Balige)

Molo mulak hamu saolat nai,
sahatma nian sita-sitam,
gabe ho, gabe jala sonang.

Molo mulak hamu saolat nai,
lehon roham tu baringin partangiangan.
Tamburon uratna unang hona gara ni ari.
Paiason bonana, asa bagak idaon dung bonom mataniari.
Pauneon alamanna, asa siat nahundul di laon ni ari,
marsada martangiang, pasangap Mulajadi.

Molo sahat hamu saolat nai,
molo boi nian, unang topek di topi ni ari.

17 Maret 2011

PUISI BATAK | JOU AHU MOLO LILU

Tarulang ladang Amang, jou ahu. 

Mahiang saba Inang, marigat gadu-gadu, jou ahu. 

Manunda si parbue Amang-Inang, 

gorahon ahu sian balatuk ni jabu, 

pittor ro do ahu, ro tarhipu-hipu. 

Nunga salpu dakdanak tahe, 

tano ranto nama nidege mangaranto tahe. 

Dang ladang be jinama loja ni pamatang do nihilala. 

Dang gadu-gadu be jinama marsak ni roha nama nihilala. 

Dang horbo be jinaga lomo ni roha nama pinatupa. 

Nunga salpu dakdanak salpu tahe, 

tano ranto nama nidege mangaranto tahe. 

Dang adong be namanggora gabe lilu hape. 

Dang adong be namanjou gabe lilu hape. 

Antong Amang dohot Inang naburju, 

jou ahu molo lilu, topet sian balatuk ni jabu. 

5 April 2011

PUISI BATAK | ARI JUMAT ARI ONAN

Mardalan hami sian Sirisi-risi, 

mangeal do ahu nian, 

hape inangtua manghunti hirang namarisi, 

sayur paet, bawang pere dohot kopi. 

Di abarana tali ni hajut ampe, 

indahan dohot tes isina tahe, 

tugo nami arian unang mauas jala male. 

Ujui dang adong dope becca, 

di Dolok Sanggul pe otik dope motor. 

Dua batu hami mardalan hojor, 

asa tumibu sahat tu onan,

asa gadison sude nadiboan, 

unang gabe labe-labe etongon. 

Menek dope tingki i, 

dang singkola dope nahuingot. 

Nadiparmudu inangtua do ahu saolat, 

ala natua-tua laho tu Jakarta borhat. 

Dung sahat hami tu onan, 

hutaruhon kopi tu tokke namokmok i, 

dungi hupahembang hami dua goni namaribak-ribak, 

dipajojor inangtua boanonnai, 

dang sadia leleng suda sude gojap. 

Serom ma ibana, 

serom ma ahu tong mangalompit goni namaribak-ribak. 

Mardalan pat do hami tong mulak, 

Sira, dengke asin, kaccang nama isi ni hirang, 

martabak muse dohot saliter rondang-rondang. 

Ahu pe somangeal be, 

ditanganhu karupuk jange nakambang, 

dohot sabungkus roti bulan. 

7 Maret 2011

PUISI BATAK | HUTA HUTA DO HUTANAMI

Huta-huta do hutanami 

Huta nasolot di tano Humbang 

Hasundutan mataniari 

Huta-huta do hutanami 

Dilinggomi dolok pinapan 

Jala mas nagorsing maringanan 

Godang muse hau namarulubalang 

Huta-huta do hutanami 

Huta namanubuhon anak-boru parsingkola 

Godang muse angka namarpangkat 

Huta-huta do hutanami 

Huta napagodanghon napistar namalo 

Malonai tung so taralo 

Huta-huta do hutanami 

Huta namangolu sian denggan ni tano 

Tubu salak tubu bagot 

Tubu kalapa godang habang sitindaulok 

Tubu tobu godang habang salimpoppot 

Tubu atturmangan habang ambaroba habang marimpotimpot 

Tubu kueni tubu same napompot 

Rias pe rade, siala buni-buni monggop di tano nahornop 

Tubu muse nilam tubu horbo maradu marponjot  

Huta-huta do hutanami 

Godang sampuran maradu timbo 

Mian di si ihan aekna nalambok 

Tabo di si marlange molo ari mansai mohop 

Huta-huta do hutanami 

Alai tu luat naasing dang talu gogo nami 

Dang talu malo 

Dang talu mora 

Dang talu mokmok 

30 Nopember 2010

PUISI BATAK | MANGALALANG AMBASANG

Jumpa di tingkina uju so borhat singkola 

Sangahonon do tu bona ni ambasang

Luluan borasna namadabu marsampatan 

Allangon annon dung sae parsiajaran 

Olo do dapot tolu rodi lima 

Molo tolu do ba pasmai antong 

Sabiji di reses parjolo 

Sabiji nai di reses paidua 

Sabiji nai muse dung mulak annon 

Niula do loja mamboan on 

Umborat sian bukku parsiajaran 

Ala molo adong ambasang on 

Tung godang do mangido mardongan 

Alai molo so dapotan sadarion

Ingkon ibama loja mangalului dongan 

Dang piso binaen mangalangkati 

Niharutus do sahat tu sibuknai 

Sae sakkarut pinasahat du dongan 

Diharut ibana muse dipasahat tu naasing dongan 

Lima baba mangharut sada ambasang 

Sampe so adong be tonggina 

Sabut nai pe sampe marlangan 

Antong asa unang dapot namarlangan

Iba ma nian dapotan mangalalang 

28 Agustus 2010

PUISI BATAK | MANGAN MANOGOT TINGKI SINGKOLA

Indahan nabodari namarhorak i 

Tuanghonon aek las tu si 

Janggut-janggut nangali 

Pinasisi uju marbagi dohot anggi 

Tabo do nian parniahapan najolo 

Alai nuaeng on tung so hataon do 

Lumobi molo habis ikkan 

Sira nama binahen dongan 

Nigaorhon tu indahan 

Ima gogo borhat marsiajar 

Mangalele malo ni angka dongan 

Mongan manogot tingki singkola 

Unang be tarulak nian 

23 September 2010

UTTEJAU NAMALAMUN

Onma namasa di hutanami 

Maol do dapotmu uttejau namokkol 

Lamma namalamun 

Haru narata pe suda 

Ai metmet dope nunga didugur

Mutiknaipe dohot sabur marurus 

Onma tahe uju dakdanak 

Soadong allangon tikki marmeam 

Uttejau nang mutikna niparhajop nama 

Tung ipe nunga sonang roha 

14 Agustus 2010

BURA-BURA TU SUPIR LOJING

Bursikma ho anaha 

Molo adong borua bursik ma ho 

Londosonmu tano napagodanghon 

Urbuknai manompas pardompahan 

Bustaknai sampat sahat tu balanga 

Bursik tu ho anaha dohot ho borua 

Segaonmu dalan 

Segaonmu alaman 

Segaonmu parbalokan 

Segaonmu muse pansur paridian 

Sursaronmu nang parpamilian 

Londosma ahu anaha 

Tombomma napagodanghon ho borua 

Lupa ho huompa di tanggurungki 

Lupa ho di panarusanki 

Tabodo engkelmi tingki gelleng 

Ia dung magodang 

Mara boanonmu tu bona ni pinasa 

Bursikma ho anaha 

Bursik tong ho borua 

Molo mate ahu 

Matema ho tong di roha 

9 Agustus 2010

HUTA NALONGO

Jou-jou... 

Jou-jou marhuratak martangi-tangi ho nalilu 

Jou-jou... 

Jou-jou pasahat arsak marsabur ilu 

Dison uratna parbuena tung timbo 

Dabu malala soadong maningkirho 

Jou-jou... 

Jou-jou jabu nang huta nabajar namarbaju 

Jou-jou... 

Jou-jou bollang simalolong marilu 

Berengon alaman somarhandang pajok tu tano 

Napuran marrata marsiranggut tu tarup dabo

Ima jou-jou tuho 

Jou-jou ni huta nalongo 

Naung hapit di roha ni angka bangso 

Satongkin nai laos mago 

Jou-jou... 

Ima jou-jou tuho 

Jou-jou ni huta nalongo 

10 Juni 2010

TANGISHU DOLOK SANGGUL

Nunga sabur mudar dongan 

Malala ate-ate mambege i dongan 

Timus pe manosak andora dongan 

Natudia laho bisuk ni roha dongan 

Segama namartutur 

Namarhombar balok martanggir salot 

Bada tu bada manghutur 

Nga tudia namarbisuk solot 

Seganai partondongan ale dongan 

Alani muruk nasohataon 

Seganai parpamilion ale dongan 

Alani bupati tu lima taon

Inang mangalo boruna 

Amang mangalo ianakkonna 

Amangboru mangalo paramannya 

Tulang mangalo berena 

Ompung mangalo pahompuna 

Baoa mangalo ibotona 

Simatua mangalo helana 

Dongan mangalo donganna

Alani silima taon siboan mara 

Tangishu mai Dolok Sanggul 

Tangis siboan mudar narara

26 Mei 2010

HUPAIMA HO PAHOMPUKKU

Nunga botari nuaeng boru 

Mataniari dangbe mohop situtu 

Anggo pamatanghu tong dope boru 

Margara-gara situtu 

Hosakku pe nunga sangkot-sangkot 

Modom tung soboi tigor 

Berengma boru 

Hundul nama ahu asa boi marhosa 

Asa boi modom dang marngilu-ngilu 

Hancit hian boru 

Nunga sai naeng mangido nian tu Tuhan 

Asa dialap ahu bornginon 

Asa ditongoshon suru-suruan 

Manogu simangidokku tu lambung-Nai 

Alai molo hubereng ho boru 

Hubereng siubeonmi 

Muba do roha Hutaonma hancitni kanker on 

Stadium opat on 

Di siubeonmi borukku 

Martabuni pahompukku naparpudi 

Berengonhu nian satongkin 

Paima lao ahu salelengna 

Tu nampuna tondi nampuna jolma 

Di siubeonmi borukku 

Paimaonhu pahompukki 

Asa las rohakki lao 

Adong panggantikki 

Hupaima ho ale pahompukku nauli 

Amangoi hancitnai Tuhan... 

10 Mei 2010 

Note: RIP Amarhumah Inangtua Surabaya